ROXAS CITY – Nangin sentro sang diskurso-pribilehiyo ni City Councilor Albert Gregory Potato ang isyu sang pagpaguba sang ginapahayag maayo pa nga karsada sa San Roque Street, sining siyudad sang Department of Public Works and Highways (DPWH) kun sa diin nagserbi nga contractor amo ang G. Arabia Platinum Construction and Development Corporation.
Gintuad ni Potato ang huol nga natuga sang amo nga proyekto sa mga motorsita kag mga residente.
Ginpahayag ni Potato nga ang DPWH kag ang nasambit nga kontraktor ang wala sang nangin koordinasyon sa gobyerno sang siyudad.
Gin-athag sang konsehal nga antes makasugod sa konstruksiyon ukon pagkaayo sang mga dalanon nga sakop sang siyudad, dapat nga may yara sang nagakaigo nga permit nagikan sa lokal nga gobyerno.
Suno kay Potato nga sandig ini sa naga-eksister nga City Ordinance 46-2016 kun sa diin nasaad nga dapat may permit gikan sa gobyerno sang siyudad ang mga road projects sang anuman nga ahensiya, mangin ang mga national highways.
Yara suno diri sa lebel sang konseho sang siyudad ang pag-aprubar sang nasambit nga permit.
Pinaagi sini suno kay Potato, ma-tsekyar sang gobyerno sang siyudad ang amo nga proyekto agud mahibaluan ang ili mga dapat himuon antes suguran ang nasambit nga proyekto.
Kalakip diri ang pagpahamtang sang mga early warning devices.
Diri man hibaluon sang konseho kun makatuga bala sang huol sa mga pumuluyo ang isa ka proyekto kag hibaluon man kun nagakadapat gidman nga kaayuhon ang isa ka karsada.
Magluwas pa diri, importante man suno sa konsehal nga ma-tsekyar sang konseho ang timeline sang proyekto antes sila mag-isyu sang permit para sa pagsugod sang konstruksiyon sini.
