ROXAS CITY – May nadihon na nga plano ang Department of Public Works and Highways (DPWH) agud solusyunan ang nagakatiphag nga river-control sa Tico River sa Barangay Tico, Panay Capiz.
Ini ang ginpahayag mismo sang hepe sang Maintenance and Construction Division sang DPWH Capiz 1st Engineering District nga si Engr. Julius Abela sang mainterview sang Bombo Radyo.
Suno kay Abela nga madugay na nila nga ginpaidalom sa maid-id nga pagtuon ang paghatag sang solusyon sa amo nga problema kag ila naman nga narekomendar ang pagpakaayo sini sa ila nga central office.
Ginpahayag pa sini nga indi sang bag-o ang nasambit nga river control bangud 20 ka tuig na ang nakaligad humalin sang nahuman ini kag wala pa ma-restore.
Kapin sa 60 metros suno kay Abela ang nagguba nga river-control sa amo nga lugar nga kinahanglan kaayuhon.
Apang suno kay Abela, sa tion nga mapondohan na sang ahensiya, mangin dire-diretso ang pagkaayo sang river-control indi lamang sa Barangay Tico kundi lapos sa banwa sang Panay kag Pontevedra.
Ini ang kabahin suno sa iya sang kawsa sang ahensiya nga maamligan ang Panay River kag makahatag sang bulig sa pagpasanyog sang turismo.
Posible suno kay Abela nga sa ini nga tuig 2020, matigayon na nga ma-release ang pondo para sa pagpakamaayo sang nasambit nga river-control.
