ROXAS CITY – Ginkompirma sang pamunuan sang Department of Public Works and Highways (DPWH) nga may pila pa ka mga proyekto sa probinsiya sang Capiz nga indi nila mahimo mapadayon apisar nga na-downgrade na sa General Community Quarantine (GCQ) ang probinsiya.
Ini ang ginpahayag mismo sang hepe sang Maintenance and Construction Division sang DPWH Capiz 1st Engineering District nga si Engr. Julius Abela sang mainterview sang Bombo Radyo.
Ginklaro ni Abela nga wala nila gina-abandonar ang mga proyekto apang indi pa ini mapadayon bangud sang pila ka mga requirements nga kinahanglan pa nga matuman sa idalom sang Department Order No. 35 sang DPWH bangud sang COVID-19 pandemic.
Suno kay Abela nga antes makapadayon sa proyekto ang contractor, kinahanglan pa sini nga makatuman sa gina-require nga quarantine guidelines.
Kinahanglan man nga antes maka-trabaho ang mga construction workers, makapaidalom sila sa COVID-19 test para mahatagan sang construction quarantine pass.
Magluwas diri suno kay Abela, indi man basta-basta makapasulod sang mga materyales sa probinsiya bangud sang strikto nga border checkpoints kag indi man basta-basta makapadulong sa probinsiya ang mga trabahador gikan sa iban nga ka-probinsiyahanan.
