ROXAS CITY – Gin-athag sang Department of Public Works and Highways (DPWH) ang rason sa pagka-delay sang pagkaayo sang karsada sa may bahin sang Rizal St., Barangay VII, Roxas City.
Sa interview sang Bombo Radyo kay Engr. Julius Abela, Chief Construction Division, sang DPWH-Capiz 1st District Engineering, ginpahayag sini nga dapat bulan sang Hulyo tapos na ang proyekto sang contractor nga Golden Banner Construction nga nakaba-se sa Iloilo, nga asphalt overlay, apang natukiban sang mga ini nga indi istable ang pinaka-base sang dalan bangud labno ini, gani kinahanglan nga islan sang suitable materials, antes patigayunon ang asphalt overlaying.
Bangud sa wala ginlauman nga sitwasyon sang karsada, ginhatagan sang approve time extension ang contractor para sa 28-diyas nga ‘pouring period’ antes butangan sang aspalto.
Nagakahulogan nga ginkakas nila ang unsuitable materials kag gin-islan sang nagakadapat nga materyales antes ang asphalt overlay, nga wala sa ila original contract.
Naintindihan man sang Enhinyero ang sentimyento sang mga apektado nga motorista, negosyante kag pumuluyo sa lugar, apang indi sila makagamit sang basta-basta nga materyales agud mapadasig ang trabaho, kag nagasunod lamang sila sa standard operating procedure, agud mangin dekalidad ang ila proyekto.
Ginsiling man sini nga antes magtandog ang contractor sang karsada, naka-koordinar na ang mga ini sa City Engineer’s Office.
Ginpasalig ni Abela nga sa masunod nga semana subong nga Agosto, pagasuguran na ang pag-aspalto sa nasambit nga dalan.
