ROXAS CITY – Ginhatagan sang sabat sang hepe sang maintenance and construction division sang Department of Public Works and Highways (DPWH) Capiz 1st Engineering district ang reklamo sang mga motorista angut sa mga poste sang electric cooperative kag telecommunications company nga nahamtang sa dalan nga masami ginatunaan sang aksidente sa dalanon.
Ginpahayag ni Engr. Julius Abela nga wala nagkulang sa pagpahanumdum ang ahensiya sa mga public utilities kag telecommunications company sang ila nga obligasyon angut sa ginakabig iligal nga istruktura sa dalanon.
Suno sa opisyal nga yara pa lamang sa planning stage ang Planning Section sang ahensiya, nagpakig-angut na sila sa natungdan nga mga talatapan nga i-transfer ukon i-relocate ang naga-eksister nga mga poste.
Apang bangud sa pagsinaku-ay sadto nga mahingagaw pasiga ang elektrisidad matapos ang pagpanalasa sang bagyo Yolanda wala maobserba sang electric cooperative ang ensakto nga distansiya sang pagpahamtang sang poste sa road centerline.
Samtang liwat magapatawag sang coordination meeting ang talatapan sa natungdan nga mga public utilies agud liwat sila mapahanumdum sang ila obligasyon nga i-transfer na nila ang mga poster ukon anuman nga obstruction sa dalanon agud malikawan ang aksidente.
Ginklaro pa ni Abela nga isa ka criminal act ang anuman nga obstruksyon sa dalanon.
