Ginganyat sang Department of Public Works and Highways (DPWH) ang bicameral conference committee nga ibalik ang P45 bilyon nga ginbuhin gikan sa ila ginaproponer nga pondo para sa ginabanta 10,000 ka mga proyekto sa tuig 2026.
Suno kay Public Works Secretary Vince Dizon, mahimo nga indi lubos nga mapatuman ang mga proyekto kun indi mabalik ang pondo.
Ang mga pagbuhin sa budget naghalin sa paggamit sang Senado sang ginbag-o nga Construction Materials Price Data (CMPD) bilang basehan para sa bug-os nga pagbuhin.
Ginpanindugan sang DPWH nga dapat ini ipatuman sa kada proyekto bangud nagalain-lain ang presyo sang mga materyales depende sa lokasyon.
Ginklaro ni Dizon nga ang pagpanumbalik wala nagakahulugan sang pagnubo sang pondo para sa tagsa ka proyekto, kundi agud masiguro nga lubos nga mapatuman ang mga proyekto.
Ginpanindugan naman sang Senado ang ila panindugan nga nagasiling nga mahimo sa gihapon nga mapatuman ang mga proyekto kun bag-uhon sang sakop sang DPWH suno sa gin-aprubahan nga pondo.
Pahayag pa ni Dizon, sundon dapat sang ahensya ang desisyon sang Kongreso kag indi na paggamiton ang daan nga presyo sang construction materials.
Nahibaluan nga ang pagbuhin sang budget kasunod sang flood control scandal, sa diin natukiban nga overpriced ukon substandard ang pila ka mga proyekto sang DPWH.
