ROXAS CITY – Ginkumpirmar sang Department of Public Works and Highways (DPWH) Capiz nga ginapadayon nila ang pagpatuman sang road widening project apisar nga may poste, nga yara sa tunga sang karsada.
Ini bangud maapektuhan ang performance sang DPWH-Capiz, subong man ang ekonomiya sang probinsya, kun indi nila mapatuman ang proyekto sang national.
Sa interview sang Bombo Radyo kay Engr. Julius Abela, sang Capiz 1st Engineering district, suno diri nga may Memorandum of Understanding na ang DPWH kag DOE kun sa diin, ang mga electric companies sa Pilipinas ang nagpatigayon sang pagsinapol agud hinalaan ang mga obstruction sa proyekto sang DPWH.
Nagakahulogan nga may pondo ang gobyerno, agud i-relocate ang mga poste nga naapektuhan sang ila proyekto.
Sa pagkamatuod, ang electric cooperative sa Capiz nga amu ang CAPELCO ang may pinakadako nga kantidad nga gin-request sa DPWH central office, sa bug-os nga Pilipinas.
Naintindihan man ni Abela ang tagdumalahan sang CAPELCO nga indi madali-dali ang pag-relocate sang mga poste bangud wala man sang aksyon ang mga telecommunication companies nga nagaangut sa ila poste.
Bangud diri, plano sang ila ahensya nga magpatawag sang pagsinapol kaupod ang CAPELCO kag telcos sa Capiz, agud mapadasig ang implementasyon sang amu nga proyekto sa probinsya.
Matandaan nga sa separado nga interview sang Bombo Radyo kay CAPELCO General Manager Engr. Edgar Diaz, suno diri nga ginabulubanta P320-M ang ila magasto agud ma-relocate ang tanan nga poste sa probinsya, apang P56-M pa lamang ang ginrelease sa ila sang DPWH.
