Pugad na sang kriminal nga sindikato ang Department of Public Works and Highways (DPWH) suno kay Senador Ping Lacson.
Suno sa senador, nakabaton siya sang panibag-o nga impormasyon nga nagapakita sang kaangay mafia nga mga operasyon sang pila ka engineering offices sang ahensya sa nagkalain-lain nga bahin sang pungsod.
Ginbuyagyag ni Lacson nga pila ka mga opisyales sang DPWH ang naulamid sa mga anomalous flood control projects, lakip na ang mga wala nalakip sa report nga ginsumiter kay Presidente Ferdinand Marcos Jr.
Suno sa iya, madamo sang “kalokohan” sa sulod sang ahensya, kasubong sang mga district engineers nga nagamaniobra sang proyekto kag bisan ang Philippine Contractors Accreditation Board nga may kaugalingon man nga mga anomaliya.
Ginhatagan punto ni Lacson nga ang ini nga mga kaangay sang sindikato nga aktibidad ang indi lang sa Bulacan kundi sa iban man nga lugar kaangay sang syudad sang San Carlos sa Negros Occidental.
Una na man niya nga ginbuyagyag sa iya privilege speech ang korapsyon sa mga flood control projects sa Pampanga, La Union, kag Oriental Mindoro.
Gindugang pa sang senador nga nakabaton siya sang mga report angut sa mga kwestyonable nga kontrata nga ginhatag sa mga fly-by-night contractors kaangay nanday Darcy kag Anna Builders nga nag-secure sang flood control projects sa Bulacan.
Mas seryoso pa suno kay Lacson ang papel sang pila ka mga mamalidha nga nagaduso sang “insertions” sa budget para sa sini nga mga proyekto.
Bangud sang kakulang sang transparency, wala sila makilala kag nagapabilin nga hilway sa salabton.
Ginhatagan pagtamod ni Lacson nga ang pagkadalok amo ang nagatulod sang korapsyon sa 2025 General Appropriations Act, sa diin mas daku nga alokasyon ang nagkadto sa DPWH sang sa sektor sang edukasyon, isa ka bagay nga batok sa Konstitusyon.
Gindugang sini nga bisan ang PhilHealth subsidy ang apektado bangud sa mga realignment nga ginhimo agud paboran ang mga proyekto sang pila ka mga “funders.”
Ginhatagan pagtamod sini nga ini ang rason kon ngaa padayon ang iya panawagan para sa bug-os nga transparency sa proseso sang badyet agud matumod kag manabat ang mga mamalidha nga imbolbado sa mga anomalya kag ghost projects.
