Nagpanawagan si Sec. Vince Dizon sa publiko nga indi paghusgahan ang tanan nga staff sang departamento sa tunga sa nagapadayon nga mga isyu sang mga anomalya kag korapsyon sa sulod sang Department of Public Works and Highways (DPWH).
Naghingyo ini nga indi gilayon paghusgahan kag paghatagan sang malain nga panulok ang tanan nga mga empleyado kag staff sang ahensya.
Gin-athag sang tiglikom nga indi tanan nga empleyado ang nadalahig sa sini nga mga alegasyon, kag madamo sa ila ang tampad kag dedikado sa ila trabaho.
Dugang pa, ginhatagan pagtamod ni Sec Dizon nga ang pila ka mga tinawo sang DPWH naga-eksperyensya na sang malain nga pagtratar, lakip na ang pagpang-harass kag pagpang-bully, bangud sa nagadaku nga kontrobersiya.
Ang mga inosente nga empleyado, nga wala sang labot sa mga isyu, apektado kag nagaeksperyensya sang negatibo nga mga epekto.
Bangud sini nga sitwasyon, naghingyo ang unyon sa mga empleyado sang DPWH nga temporaryo nga kuhaon ukon i-suspend ang uniform policy.
Katuyuan sang sini nga pangabay amo ang pag-amlig sa mga inosente nga empleyado gikan sa posible nga diskriminasyon ukon pagpanghimulos sa tion sang imbestigasyon.
Pahayag ni Dizon, masubo hunahunaon nga ang mga sensible nga empleyado sang DPWH amo ang labi nga apektado kag nagaantos sa mga nagakatabo.
