Patay ang isa ka trabahador sang Department of Public Works and Highways samtang pilason naman ang isa matapos nga nadalahig sa road crash incident sa diversion road, Barangay Domoit sa syudad sang Lucena.
Base sa imbestigasyon sang kapulisan, natabo ang insidente alas 9 sang aga samtang nagapatigayon sang inspection ang apat ka personnel sang DPWH lakip na ang duha ka mga biktima sa naguba nga section sang dalan sa atubang sang nag-untat nga dump truck sang ahensya.
Makit-an sa CCTV kag dashcam footage nga narekober sang mga otoridad nga hinali lang nga nagbunggo ang isa ka trailer truck sa likod sang nag-untat nga dump truck.
Bangud sa kabaskugon sang impact, nag-abante ang dump truck kag direkta nga nag-arado sa duha ka trabahador.
Isa sa mga biktima ang ginbawian sang kabuhi sa pag-abot sa ospital, samtang ang isa naman ang nag-angkon sang nagkalain-lain nga pilas kag padayon pa nga ginabulong.
Suno sa driver sang trailer truck, ginpahayag nga natulugan ini samtang nagamaneho rason nga naaksidente ini.
Yara na sa kustodiya sang kapulisan ang driver sang truck kag nagapangatubang sang kaso nga reckless imprudence nga nagresulta sa homicide, physical injuries, kag kahalitan sa propedad.
