ROXAS CITY – Nagapadayon ang dredging activity sa mga kasubaan sa nagkalain-lain nga barangay sa banwa sang Panay.
Sa interview sang Bombo Radyo kay Mayor Vicente Bermejo, suno diri prayoridad sang iya administrasyon nga hatagan sang solusyon ang madasig nga pagbaha sa lugar nga nagadugay sang pila ka adlaw ilabi na kun magbubo ang mabaskog nga ulan.
Pahayag sini, sa panahon sang dredging activity natumod ang pila ka mga rason sa pagbaha amu ang barado nga alagyan sang tubig dala sang mga kahoy, nipa kag basura.
Gani, magluwas sa paglimpyo sa kasubaan ginpangtapas man ang mga nipa nga yara malapit sa suba agud indi na magresulta sa pagtinir sang tubig.
Ginasiguro man ni Bermejo nga magadihon pa ini sang mga proyekto nga makapaayo sa banwa.
Nagapasalamat man ang alkalde sa bulig nga ginhatag nga P5-M ni Governor Fredenil Castro agud suportahan ang dredging activity.
