ROXAS CITY – Natalana nga pasakaan sang nagakaigo nga panumbungon ang isa ka driver kag kaupod sini nga pahinante sang isa ka tanker truck nga nadakpan sa drug buybust operation sang mga kapulisan sa Barangay Dinginan, Roxas City.
Panumbungon nga paglapas sa Republic Act 9165 ukon Comprehensive Dangerous Drugs Act of 2002 kag Republic Act 10591 ukon Comprehensive Law on Firearms and Ammunition ang igapasaka batuk sa mga suspek.
Ginkilala ang mga nadakpan nga sanday German Manatad, 37 anyos, driver sang trak nga residente sang Cagayan de Oro City kag ang pahinante nga si Dexter Mape, 25 anyos sang San Antonio, Quezon province.
Ang nasambit nga operasyon ang ginkasa sang mga katapo sang Station Drug Enforcement Unit (SDEU) sang Roxas City Police Station kag Philippine Drug Enforcement Agency (PDEA).
Narekober sa mga suspek ang apat tanan ka sachets sang shabu, mga drug paraphernalia, isa ka M16 rifle nga may duha ka magazine kag 15 ka mga bala, isa ka .45 calibre nga armas-luthang nga may 5 ka mga bala, 3 ka cellphones, mga resibo kag ang ginasakyan sang mga ini nga Isuzu tanker truck.
Mahibaluan nga gikan ang mga ini sa Bacolod kag magadul-ong sang ‘Molasses’ sa Batangas nga magaagi sa Culasi port.
