ROXAS CITY – Nagaapelar karon sang ‘public apology’ sa Police Regional Office 6 kag Philippine Army si Baltazar Saldo sang Barangay Sto. Angel, Dumalag, Capiz matapos nasal-an nga lider sang rebelde nga grupo nga gin-aresto kag ginserbihan sang apat ka mga warrants of arrest sa Poblacion Tacas, Cuartero, Capiz.
Sa interview sang Bombo Radyo kay Saldo, ginpahayag sini nga indi mabayaran sang anuman nga kantidad sang kwarta ang kahuy-anan nga nahatag sa ila sang palpak nga operasyon sang mga otoridad.
Halos nagapalangurog si Saldo sang ginbalikan sini ang ginhimo nga pag-aresto sa iya sang mga miyembro sang Police Regional Office 6 – Regional Intelligence Division kag Philippine Army 61st Infantry Battalion.
Suno sa iya samtang naga-estoryahany sila sang mga kaupdanan sini nga driver, hinali na lamang may nag-untat nga itom nga salakyan sa ila atubangan kag may naguha nga mga armado nga kalalakinhan kadungan sang pagpahapa sa iya.
Gindugang pa sini nga gintapakan pa sang isa ka opisyal ang iya nga ulo antes ini ginposasan.
Sang ginpaatubang sa media, halos malipong si Saldo sang ginbasa ang mga akusasyon batuk sa iya.
Kasubong nagabutan sang tunok si Saldo sang may nag-abot nga duha ka mga kababainhan sa Kabankalan City Police Station kun sa diin ini gin-kustodiya kag nagpanindugan nga indi siya si Virgilio Paragan, commanding officer sang Roger Mahinay Command, Komiteng Rehiyon-Negros sang Communist Party of the Philippines-New People’s Army (CPP-NPA) nga madugay na nga ginaayam sang mga otoridad.
