ROXAS CITY – Patay ang isa ka 43-anyos nga driver matapos nga naaksidente sa ginamaneho nga motorsiklo sa Barangay Dinginan, Roxas City.
Ginkilala ang biktima nga si Elmo Gardose residente sang isa ka barangay sa Tapaz, Capiz.
Base sa inisyal nga imbestigasyon sang Roxas City Police Station nga samtang ginasubay sang biktima ang nasambit nga dalanon hinali na lamang ini nga nadulaan sang kontrol sa pagmaneho rason nga naglapaw ang iya motorsiklo sa gutter sang karsada.
Bangud diri, natumba ang motorsiklo rason nga tumampilak ini sa karsada.
Nag-angkon naman sang patal nga pilas sa ulo ang biktima nga gintunaan naman sang iya nga kamatayon.
Nahibaluan nga yara sa idalom sang impluwensya sang makahulubog nga ilimnon ang biktima sang natabo ang aksidente.
Gintingwaan pa sang Capiz Emergency Response Team ukon CERT nga madala sa ospital ang biktima apang gindeklarar naman ini nga dead on arrival sang attending physician.
