IVISAN, CAPIZ – Nagnegatibo sa drug test ang driver sang 10-wheeler truck nga nagpang-arado sa 28 ka mga salakyan sa Barangay Poblacion Norte, Ivisan, Capiz.
Sa pagpakig-angut sang Bombo Radyo kay PMAJ Ruby Magallanes, Hepe sang Ivisan Municipal Police Station, ginpahayag sini nga gilayon nga ginpaidalum sa drug test sa Capiz Provincial Forensic Unit ang driver suspect nga si Ryan Molato, 39-anyos sang Brgy. Tarong, Carles, Iloilo.
Samtang natalana naman nga makighinun-anon subong nga adlaw ang abogado sang kompanya nga ginaubrahan sang suspek sa mga naulamid nga biktima.
Mahibaluan nga duha na ang kumpirmado nga napatay sa natabo nga aksidente sa banwa sang Ivisan, ginkilala ang mga biktima nga sanday Maricel Sargento, 39-anyos, isa ka streetsweeper kag ang isa ka senior citizen nga lalaki.
Padayon naman nga ginabulong sa ospital ang 12 pa nga nagkalapilasan.
Nagapabilin sa prisohan sang Ivisan PNP ang driver suspect kaupod ang mga pahinante sini para sa nagakaigo nga disposisyon.
