ROXAS CITY – Dakop ang isa ka 33-anyos nga driver matapos natukiban nga iligal ang mga kahoy nga ginkarga sa ginamaneho sini nga 6 wheeler truck sa Barangay Poblacio Takas, Cuartero, Capiz.
Ginkilala ang naaresto nga si Melvin Duran 33-anyos sang Barangay Mianay, Sigma, Capiz.
Base sa inisyal nga imbestigasyon nga samtang nagapatigayon sang patrolya ang mga kapulisan nakit-an na lamang ang amo nga truck nga may yara sang karga nga mga kahoy.
Kasunod sini, gilayon nga gin-usisa sang mga pulis ang amo nga driver kag ginpangitaan sang permit ukon dokumento sa pagkarga sang mga kahoy apang napaslawan ini.
Bangud diri, gin-aresto ini kag yara na sa kustodiya sang Cuartero PNP samtang ang mga kahoy naman ang ginturn-over sa MENRO sang nasambit nga banwa.
