ROXAS CITY – Wala nakasalbar sa kamatayon ang driver sang bus, matapos ginluthang sang wala pa makilan-an nga suspek sa Barangay Dacuton, Dumarao Capiz.
Ginkilala ang biktima nga si Noel Enarciso Agnes 44-anyos kag residente sang nasambit nga lugar.
Sa impormasyon nga nakuha sang Bombo Radyo nagikan sa Dumarao Municipal Police Station, ginapahayag nga sang natabo ang insidente naga-inum-inum ang biktima kaupod ang abyan sini nga si alyas Alog, 27-anyos, butcher, kag residente sang amu nga banwa.
Suno sa witness nga si Reymark Longno, nakabati ini sang lupok sang armas luthang kag sa iya pagtsekyar sa lugar nakit-an sini ang biktima nga duguon kag may pilas na sa wala nga bahin sang iya kamot kag tiyan.
Gilayon man ini nga gindala sa Dao District Hospital agud dapatan kun tani sang nagakaigo nga pagbulong apang gindeklarar nga dead on arrival sang doctor.
