ROXAS CITY – Tatlo pa lang kaadlaw sang nag-abot sa banwa sang Panay ang driver sang riding-in-tandem nga nagluthang-patay kay Punong Barangay Frederick ‘Dikoy’ Dullano.
Ini ang ginkumpirmar ni PLt. Gary Diaz, hepe sang Panay MPS sang mainterview sang Bombo Radyo.
Suno kay Diaz, nakabaton sila sang impormasyon nga may yara sang lalaki pangayaw nga nag-abot sa nasambit nga banwa, rason nga hugot sini nga ginmonitor sang kapulisan ang pagkakilanlan sang persona kag nagtugma ang impormasyon sa driver nga si Gilbert Bacong Berte.
Matandaan nga nadakpan si Berte sang kapulisan sa isa ka waiting shed nga sakup sang Barangay Linao nga may dala nga mga bag kag posible tuyo kuntani nga maghalin sa probinsya.
Pahayag ni Diaz, nga ba-se sa panaysayon ni Berte, ginkumpirmar sini nga siya ang driver sang gunman kag ginbayaran lamang ni Renante Banate nga imaneho ang motorsiklo bangud may pagasukton lamang sa banwa sang Pontevedra.
Apang, ginkakibot na lang sini ang pagluthang ni Banate kay PB Dullano nga nagresulta sang kamatayon sang kapitan.
Sa pagsaysay pa ni Berte sa hepe, matapos ang insidente nagpadulong sila sa banwa sang Maayon kag nagbulagay sila sang gunman.
Suno kay Berte bangud sa kahadlok nga naulamid sa pagpatay, nagpalagyo ini kag nagpanago sa mga kapulisan.
Sa karon, yara na sa kustodiya sang Capiz Rehabilitation Center si Berte para sa nagakaigo nga disposisyon.
