ROXAS CITY – Yara na sa isa ka punerarya ang bangkay sang driver sang Suzuki smash nga motorsiklo nga nagaduag pink nga nagbunggo sa ford explorer nga salakyan sa Roxas City public plaza.
Ginbawian sang kabuhi samtang ginabulong sa Roxas Memorial Provincial Hospital si Arnaldo Benigla 26-anyos sang Barangay Dulangan, Pilar, Capiz.
Sandig sa imbestigasyon sang Roxas City PNP nga padulong ang biktima sa Magallanes St., sang aksidente nga nabungguan ang ford explorer nga ginamaneho sang Chinese national nga si Chuishi Chen 34-anyos sang Sitio Ilaya, Barangay Tanque, Roxas City.
Bangud sa impact sang pagkabunggo, nagtabog ang biktima kag nag-angkon sang patal nga samad sa ulo kag lawas.
Nagtuyo pa nga magpalagyo ang Chinese national, apang nadakpan ini sang mga kapulisan kag CVO.
Samtang ginhilway na sa karsel si Chen matapos nag-areglo ini sa pamilya sang biktima kag nagpromesa nga abagahon ang tanan nga kagastuhanan sa pagpalubong sa biktima.
