MAMBUSAO, CAPIZ – Ginbawian sang kabuhi ang 18 anyos nga driver sang motorsiklo kag pilason naman ang iya nga angkas matapos makabunggo sa closed van sa Barangay Población Proper, Mambusao, Capiz.
Ang driver nga napatay amo si alyas Roel, residente sang Barangay Atiplo, Mambusao samtang ang iya angkas amo si alyas Ger, 17 anyos.
Samtang ang driver sang closed van amo si alyas Jonathan, 32 anyos, residente sang Barangay Tacas, Jaro, Iloilo City.
Sa pagpakig-angot sang Bombo Radyo Roxas sa Mambusao Municipal Police Station, halin sa banwa sang Sapi-an ang motorsiklo kag padulong sa Población Proper sang Mambusao.
Ginaalegar nag-swerve ang motorsiklo, natumba tubtob nga nagragusros pakadto sa ginadalagan sang closed van nga pakadto sa Kalibo.
Pahayag sang Mambusao PNP, wala sang helmet kag wala man sang lisensya ang driver samtang ang motor nga iya ginamaneho ang ginapanag-iyahan sang angkas sini nga menor de edad.
Sa subong, nagapabilin pa sa ospital kag ginabulong ang 17 anyos nga angkas samtang nakaguwa na sa presohan ang driver sang closed van bangud nagtakop na ang iya reglementary period.
