ROXAS CITY – Madinalag-on nga nadakpan sang mga katapo sang kapulisan ang driver sang motorsiklo nga open muffler, sa Barangay Solo, banwa sang Pontevedra, kaaganhon sang Agosto 28, 2022.
Ginkilala ang nadakpan kay Edrick Degala Diaz, 34-anyos, kag residente sang Brgy. Jolongajog, sa nasambit nga banwa.
Sandig sa impormasyon nga nakuha sang Bombo Radyo sa Pontevedra MPS, naglabay sa police station ang motorsiklo nga magahod, kag tuman ka dasig ang pagpadalagan.
Bangud diri, ginlagas ini sang patrol car kag gintuyo sang driver sang motorsiklo nga likawan ang mga kapulisan pinaagi sa pagliko sa crossing sang Brgy. Solo.
Apang lipod sa iya ihibalo, ginsundan ini sang mga pulis kag natigayon nga madakpan.
Sa pagpangusisa sang mga kapulisan, si Diaz ang wala sang driver’s license, wala plate number kag wala sang may ginpresentar nga OR/CR sa iya motor.
Magapangatubang sang kaso nga ‘alarm and scandal’ sa idalom sang Article 155 sang Revised Penal Code, ang nasambit nga driver.
Sa karon, yara sa kustodiya sang Pontevedra MPS ang driver kag ang iya motorsiklo.
Samtang, paalinton ni PMaj. Syril Punzalan, hepe sang Pontevedra MPS, sa mga pumuluyo nga mag-ugyon sa ila kawsa nga pagpatuman sang layi kag ordinansa para sa kalinong sang ila banwa.
