Patay ang driver sang motorsiklo matapos mabungguan sang jeep sa Barangay Lawaan, Roxas City Proper.
Ang biktima amo si alyas Ronito 59-anyos.
Ang driver naman sang jeep amo si alyas Benjie 54-anyos lunsay residente sang nasambit nga lugar.
Sa interview sang Bombo Radyo kay Police Chief Master Sergeant Ramil Arcangeles sang Public Information Office sa Roxas Component City Police Station, iya pahayag nga base sa inisyal nga imbestigasyon lunsay pakadto ang motorsiklo kag ang jeep sa Barangay Bolo sang hinali lang may nagtabok rason nga dulaan sang kontrol sa namebela ang driver sang motorsiklo.
Suno kay Arcangeles, natumba ang driver sang motorsiklo kag nabungguan sang nagasunod nga jeep.
Gilayon gindala ang biktima sa ospital, apang ginbawian sang kabuhi.
Sa subong, yara na sa kustodiya sang Roxas Component City Police Station ang driver sang jeep para sa nagakaigo nga disposisyon.
