ROXAS CITY – Pilason ang 22-anyos nga driver sang motorsiklo matapos bumunggo sa Toyota Avanza Wagon nga salakyan sa Barangay Lanot, sini nga syudad, takna 3:40 sang hapon, Setyembre 22.
Ginkilala ang napilasan kay John Michael Delfin, residente sang Brgy Bago samtang ang driver sang salakyan ang ginkilala kay Jeremy Jons Angeles, 37-anyos, residente sang Sitio Sumiga, Brgy Milibili.
Sandig sa imbestigasyon sang Roxas City Police Station, nagikan sa parking side ang salakyan nga ginamaneho ni Angeles padulong sa Brgy Loctugan kag maga-U-turn kuntani apang aksidente ini nabungguan sang nagasunod nga motorsiklo nga ginamaneho ni Delfin.
Bangud sa impact, nag-angkon sang pilas sa magkatuhay nga bahin sang lawas si Delfin nga madasig naman ginrespondehan sang Capiz Emergency Response Team (CERT) antes ginpadangat sa Roxas Memorial Provincial Hopsital para sa dugang nga pagbulong.
Nagbatyag naman sang palanakit sa kalawasan si Angeles kag ginpadangat sang iya pamilya sa Capiz Emmanuel Hospital para sa pagbulong.
Sa karon, ginkustodiya sang RCCPS ang mga nadalahig nga behikulo para sa nagakaigo nga disposisyon samtang nagapadayon ang imbestigasyon.
