ROXAS CITY – Pilason ang isa ka 50-anyos nga construction worker matapos nga ginaalegar nga nabungguan sang mazda sedan nga salakyan sa Barangay Tanza Gua, Panay, Capiz.
Ginkilala ang biktima nga si Pepito Bacomo sang New Road, Barangay Banica sining siyudad.
Suno kay Police Staff Sergeant Bryan Zen Bacay, imbestigador sang Panay PNP nga samtang ginasubay sang biktima ang dalanon gikan sa banwa sang Pontevedra kag papuli na kuntani sang ginaalegar nga ginbungguan ini sang driver sang mazda sedan nga si Ariel Degala 57-anyos sang Pres. Roxas, Capiz.
Bangud sa mabaskog nga impact sang pagkabunggo tumampilak sa dalan ang biktima kag naguba gid ang bumper sang salakyan ni Degala.
Nag-angkon naman sang pilas sa magkatuhay nga porsyon sang lawas ang biktima nga gilayon naman gindala sang mga katapo sang Capiz Emergency Response Team ukon CERT sa pinakamalapit nga ospital agud dapatan sang nagakaigo nga pagbulong.
Sa karon, yara na sa St. Anthony College Hospital ang nasambit nga biktima.
Nagapadayon naman ang imbestigasyon sang mga kapulisan sa nagluntad nga akisidente.
