Driver sang motorsiklo pilason matapos nga nakabunggo sang layaw nga ido sa Barangay Sibaguan, Roxas City

ROXAS CITY-Pilason ang 37-anyos nga lalaki matapos makabunggo sang layaw nga ido sa Barangay Sibaguan, Roxas City.

Ginkilala ang biktima nga si Gilbert Ambion, residente sang Barangay Cudian, Ivisan Capiz.

Base sa inisyal nga imbestigasyon sang Roxas City Police Station nagaguwa nga samtang ginasubay sang biktima ang dalanon sakay sa motorsiklo sang aksidente sini nga mabungguan ang layaw nga ido nga hinali nga nagtabok sa dalan.

Bangod diri, nadulaan sang kontrol sa manubela si Ambion kag natumba sa dalan.

Nakaangkon sang pilas sa magkatuhay nga porsyon sang kalawasan ang biktima nga gindala sa isa ka pribado nga ospital sa siyudad agud madapatan sang nagakaigo nga pagbulong.