ROXAS CITY- Wala sang may ginasupreher nga bisan ano nga sahi sang balatian kag mabaskog pa ini antes maghalin sa ila puluy-an.
Ini ang ginpahayag ni Punong Barangay Nelson Barnes sang Barangay San Pedro banwa sang Pontevedra kag pakaisa sang driver sang mainterview sang Bombo radyo.
Suno diri ginkakibot sini ang balita nga nadalahig sa nagluntad nga aksidente ang iya pakaisa bangud sa lima sini ka tuig nga nagamaneho sang pampasahero nga van mahinay kag mahalong gid ini.
Dugang pa sini nga posible heat stroke ukon na dehydrate si Acunin tuga sang tuman nga kainit nga panahon.
Matandaan nga 3 ang patay matapos aksidente nga bumunggo sa puno sang mangga ang pampasahero nga L300 van nga may sakay nga 17 ka mga pasahero, Miyerkules nga adlaw Mayo 11.
Kalakip sa mga napatay amo sanday George Acunin, 61-anyos, driver sang Van nga residente sang Brgy. San Pedro Pontevedra, Capiz kag duha ka mga bystanders nga sanday Dich Lovil Villariz, 45-anyos residente sang nasambit nga barangay, kag Alinalyn Ernesto 32-anyos nga residente sang Brgy. San Esteban, Pilar, Capiz.
Nagapangayo naman sang pasaylo si Barnes sa pamilya sang mga biktima kag sa mga nadalahig bangud wala man sini ginalauman ang matabo.
