Yara sa kustodiya sang mga kapulisan sang Roxas Component City Police Station ang driver sang six wheeler truck nga naka-hit and run sa isa ka food cart sa Barangay XI, Roxas City.
Ang driver amo si alyas “Alvin”, 40-anyos kag residente sang Barangay Cabugao Este, Panay, Capiz.
Samtang ang mga biktima amo sanday alyas “Cristian” kag alyas “Jessa” nga lunsay sakay sang food cart kag residente sang Barangay Mongpong, Roxas City.
Sa interview sang Bombo Radyo kay Police Lieutenant Colonel Rogelio Tomagtang Jr., Officer-in-Charge sang Roxas Component City Police Station, iya ginpahayag nga pinaagi sa mga impormasyon sang pila ka mga informants, madasig nga natukiban ang puloy-an sang driver kag na aresto ini sa Barangay Cabugao Este, Panay, Capiz sa takna sang 8:20 subong nga adlaw.
Suno kay PLTCOL Tomagtang Jr., sa koordinasyon nila sa Panay Munical Police Station ginpatigayon ang pag aresto sa driver sang six wheeler truck sa ila puloy-an.
Nahibaluan nga natabo ang insidente sang las 10:25 sang gab-i sang Mayo 23.
Nagapabilin sa isa ka pribado nga ospital sa syudad ang mga biktima bangud nga nag-angkon ang mga ini sang nagkalain-lain nga pilas sa lawas.
Sa subong, yara na sa kustodiya sang Roxas Component City Police Station ang driver sang truck para sa nagakaigo nga disposisyon.
