ROXAS CITY – Patay ang driver sang tricycle samtang ginabulong sa isa ka pribado nga ospital matapos ginapahayag aksidente nga mabungguan sang nag-overtake nga motorsiklo sa Brgy. Lawaan, Roxas City.
Sa interview sang Bombo Radyo sa tagpamaba sang Roxas City PNP nga si PCMS Ramil A. Arcangeles, ginpahayag sini nga ang driver sang tricycle ang nagapang-edaron sang 53-anyos kag residente sang Malipayon Village, Barangay Tiza, Roxas City.
Samtang ang driver naman sang motorsiklo ang nagapang-edaron sang 15-anyos nga lalaki kag mga back rider sini nga 21-anyos kag 17-anyos lunsay mga residente sang Barangay Tiza, sining syudad.
Suno kay Archangeles, nga sang natabo ang insidente lunsay padulong sa syudad sang Roxas ang magtimbang nga bahin apang pag-abot sa lugar ginapahayag nga nag-overtake ang motorsiklo.
Bangud sa makusog nga impact, natumba kag nagbaliskad ang tricycle kabangdanan agud maapok ang driver sini.
Gilayon naman nga nagresponde ang katapo sang Capiz Emergency Response Team (CERT) kag Roxas City Emergency Response Team (RCERT) agud hatagan sang pauna nga pagbulong ang mga nagkalapisan antes ginpadangat sa separado nga ospital apang nagpamalibad nga magpaconfine ang duha ka mga back rider sang nasambit nga motorsiklo
Pahayag pa sini nga bangud sa mga pilas sa nagkalain-lain nga parte sang lawas nga naangkon sang driver sang tricycle gintransfer ini sa isa ka pribado nga ospital apang gindeklarar nga dead on arrival sang doctor samtang ginabulong.
Sa karun nagapabilin sa ospital ang driver sang motorsiklo para sa nagakaigo nga pagbulong.
Samtang yara na sa kustodiya sang Roxas City PNP ang motorsiklo kag tricycle para sa nagakaigo nga disposisyon.
