Yara na sa estable nga kondisyon ang driver sang truck kag ang 9-anyos nga menor-de-edad nga napit-agan matapos nahulog ang truck sa pil-as nga bahin sang Barangay Bula, Mambusao, Capiz.
Ang menor-de-edad residente sang nasambit nga lugar, samtang ang driver sang truck amo si alyas “Jo,” 53-anyos, residente sang Barangay Calumpang, Molo, Iloilo City.
Sa interview sang Bombo Radyo kay Police Major Ruby Magallanes, Officer-in-Charge sang Mambusao Municipal Police Station, iya ginpahayag nga ginaguyod ang truck sang wingban truck kag pag-abot sa lugar sang nadulaan ini sang control sa manebela.
Bangod sini, nahulog ang truck sa pil-as kag nagbunggo sa duha ka panimalay sa lugar, sa diin napit-agan ang menor-de-edad.
Suno kay Magallanes, totally damaged ang mga panimalay bangod sa insidente.
Samtang, plano naman sang magtibang nga bahin nga mag-areluhanay sa nagluntad nga insidente.
