ROXAS CITY – Ginhilway na sa karsel ang driver sang truck nga nakabunggo sa tricycle sa Barangay San Fernando, Pilar, Capiz.
Ini matapos nga nagpromesa man ang nasambitan nga driver nga si Jonel Dalisay nga abagahon sini ang tanan nga kagastusanan sa pagpalubong sa napatay nga pasahero sang tricycle nga si Shirley Vega 59-anyos sang Barangay Binaobawan sang amo nga banwa.
Subong man ang pagpabulong sa ospital sang tatlo ka mga napilasan nga biktima nga nga sanday Ruthmar Villa, 47-anyos nga driver sang tricycle, Bernard Sarad, 26-anyos kag Ronald Nugoy, 22-anyos nga lunsay mga pasahero.
Bangud diri, wala na sang plano nga magpasaka pa sang panumbungon ang pamilya sang biktima batuk kay Dalisay.
Matandaan nga base sa inisyal nga imbestigasyon sang mga kapulisan nga nag-overtake sa isa ka motorsiklo ang nasambit nga truck apang wala sini natalupangdan ang nagapadulong nga tricycle.
Bangud diri, aksidente sini nga nasanggit ang tricycle rason nga tumampilak sa kalsada sang mga pasahero.
Matandaan nga nalapakan sang goma sang truck ang duha ka mga tiil ni Vega nga gilayon gindala sa sa isa ka pribado nga ospital apang gindeklarar nga dead on arrival.
