ROXAS CITY – Kabahol nga drama ang pagkabig sang kadam-an nga nakakita sang CCTV footage ukon video sang ginaalegar pagkidnap sa CEO sang Double your Money Investment scam sang damlag lang sa iya puluy-an sa Las Piñas, Metro Manila.
Ini ang masami nga mabatian nga pahayag sang kadam-an nga mga pumuluyo nga nakatan-aw sang amo nga video nga naglapta na karon sa internet.
Sa pagpakig-angut sang Bombo Radyo sa mga drivers sang pampasahero nga jeep sa Roxas Integrated Transport Terminal sa Barangay Lawaan, sining syudad, kadam-an ang nagapati nga indi si Patroceño Don Chiyuto ang nakita sa video nga ginasakwat sang naka-bonnet nga mga kalalakinhan, bangud wala sang tattoo ang amo nga lalaki, buy-unan kag indi makinis, kabaliktaran sa personalidad ni Chiyuto nga tuman ka puti kag may yara sang makinis nga kutis.
Ginpahayag ni Alyas Toto, driver sang jeep nga nagabiyahe Jamindan-Roxas City vice versa nga may yara man ini sang gamay nga investment kay Chiyuto sa diin naglaum nga ma-doble man ang iya kuwarta.
Suno kay Toto nga tuman ka bahol kag pigado ang direktor nga nagdirek sa kasubong pelikula nga kahimuan man ni Chiyuto bangud sa realidad ang mga kidnappers madasig ang ila paghulag.
Apang kabaliktaran ini sa nauna nga video nga kasubong nagapinatudlanay pa ang mga suspek.
Nagapati man ini nga indi si Chiyuto ang ginsakwat sang mga suspek bangud buy-unan ini kag wala sang tattoo.
Aminado naman si Alyas Nonoy, driver sang pampasahero nga jeep nga nagabiyahe Dao-Roxas City vice versa nga investor man ini sa Double your money ni Chiyuto kag akig sa nagakahinabo sa karon nga kasubong wala na sang tsansa nga mabalik ang iya kuwarta.
Pareho sa iban indi magpati si alyas Nonoy nga ginkidnap si Chiyuto bangud scripted ang yara sa video.
Samtang gintuad naman ni Alyas Dodoy nga ginbaligya sini ang duha ka baboy sa kantidad nga P16,000 kag ini ang iya nga ginpay-in sa double your money investment scam.
Naganyat si Alyas Dodoy sa iban nga nakabakal na sang motorsiklo kag salakyan gani ginbaligya ang duha ka mga baboy kag gin-invest kay Chiyuto.
Aminado ini nga nahibaluan na sini nga isa ka scam ang investment scheme ni Chiyuto apang kasubong nadala gid ini sa maayo nga butang nga nakita.
Nahibaluan nga nakapay-out man ini apang gamay lamang kag ginbakal naman sang orok nga ila ginasagud sa karon.
