ROXAS CITY – Magkatuhay nga reaksyon ang ginpalab-ot sang mga Jeepneys, L-300 van kag tricycle drivers sa kontrobersiyal nga Memorandum Circular 036-2020 sang DILG nga nagabawal sa mga tricycle kag pedicabs sa pag-agi sa national high ways.
Sa pagpangusisa sang Bombo News team kay Kevin, driver sang jeepney nga nagabiyahe sa Roxas City, ginpahayag sini nga indi ini pabor sa kaundan sang nasambit nga direktiba bangud makaluluoy man ang mga tricycle driver kag ang pagbiyahe lamang sang tricycle ang ila nga palangabuy-anan.
Daku man nga bulig bisan paano ang mga tricycle labi na kun gab-I sa diin malaka na lamang ang jeepneys nga nagabiyahe.
Kuntani suno kay Kevin nga mahatagan lamang sang lugar nga pagaagyan ang mga tricycle.
Suno naman kay Jaime, driver sang jeep nga indi lamang kuntani paggulpihon nga dalayon na nga dumilian ang mga tricycle nga makabiyahe sa highway bangud pareho sa ila may ginapakaon man ini nga pamilya.
Apang ginpahayag ni Jaime nga may mga driver gid man sang tricycle driver nga nagapang-agaw sang linya sang jeepney sa diin kun ila hambalon, maisog pa nga nagapangakig.
Suno diri kun amo ini ang sahi sang driver mas maayo nga ipatuman na lamang sang DILG ang nasambit nga direktiba agud indi na makaperwisyo ang iban nga mga drivers.
Ginbali naman sang isa ka tricycle driver ang nangin komento ni Jaime sa diin suno diri nga wala sini nagustuhan ang nangin pahayag ni Jaime sa mga tricycle drivers.
Nagpautwas man ini sang iya sentimyento kag nagsiling nga kuntani wala gin-generalize ni Jaime ang iya komento bangud may iban man nga mga drivers nga maayo.
