ROXAS CITY – Nagapanguna sa gihapon sa lista ang ‘Driving Without License’ kag ‘Unregistered Motorvehicles’ sa mga nadakpan sang Land Transportation Office sa ginahiwat nga roadside inspection.
Sa ginpatigayon nga PIA Kapihan Episode 35 nga Land Transportation Office (LTO)-Roxas City Updates, ginpahayag ni Mr. Warren Dureza, Information Officer sang amu nga ahensya nga ang nasambit nga datos ang napagkit sa nagapadayon nga roadside inspection nga ginapatigayon sang ila nga ahensya.
Dugang pa sini, nga ang nasambit nga mga bayolasyon ang may kabaylo nga mga penalidad kun sa diin nagadalagan sa P12,000 para sa mga nagamaneho sang indi rehistrado nga behikulo kag wala sang driver’s license, kalakip na ang penalidad sa reckless driving.
Sa pinakaulihi naman nga datos sang ahensya, nagnubo naman ang mga nadakpan sang Abril 2025 nga yara lamang sa 181, ikumparar sa 343 sa kapareho nga tion sang tinalikdan nga tuig.
Panugyan naman ni Mr. Dureza sa mga motorista nga wala pa sang lisensya nga kun mahimo magkuha na kag i-renew ang rehistro sang tagsa ka mga behikulo kun ini ang expired na kag sa mga wala pa makarehistro, magparehistro na.
