ROXAS CITY – Naglab-ot sa mas ukon menus 5 gramos ang kabug-aton sang droga kag may Standard Drug Price nga P34,000.00 ang nakumpiskar sang mga security guard sang Capiz Rehabilitation Center (CRC) nga ginpadala para kuntani sa isa ka preso.
Matandaan nga natigayon nga makuha sang mga security guard ang 2 ka sachets sang ginapatihan shabu nga nasulod sa isa ka chichirya.
Sa interview sang Bombo Radyo sa Jail Warden sang CRC nga si Arjuna Yngcong, ginpahayag sini nga may yara sang nagpadala nga pagkaon nga mga chichirya para sa isa ka preso nga si alyas “Mikay” kung sa diin gindul-ong ini sang isa ka traysikol driver.
Mahibaluan nga si alyas “Mikay”, isa ka miyembro sang LGBTQ kag 8 ka tuig na nga preso sa kaso nga paglapas sa RA 9165 ukon Comprehensive Dangerous Drugs Act of 2002.
Suno sa Jail Warden, apisar nga lipod sa ihibalo sang traysikol driver nga may yara sang illegal nga droga ang ginpadala sa iya posible nga mapasakaan sa gihapon ini sang nagakaigo nga kaso.
Sa karun, nagapabilin sa kustodiya sang Roxas City PNP ang amu nga driver sang traysikol kag natalana nga ipaidalum sa inquest proceeding.
