Nakahanda na ang nagkalain-lain nga unit sang National Capital Region Police Office (NCRPO) para sa patigayunon nga hublag-protesta sa palaabuton nga Dominggo, Setyembre 21.
Suno kay NCRPO chief Maj. Gen. Anthony Aberin, kumpleto na ang Civil Disturbance Management Units nga iga-deploy sa mga mayor nga dalan kun sa diin hiwaton ang hublag-protesta.
Linibo nga mga pulis ang magabug-os sa nasambit nga unit nga handa magbulig sa tanan nga aspeto,halin sa pagmando sang trapiko tubtob sa pag-kontrol sang mga protesters.
Pahayag pa niya, may nahimo naman sila nga alternative security plan kun may yara sang pagbag-o sa plano sang protesters.
May yara sang 2,200 ka mga miyembro sang civil disturbance management nga i-deploy samtang 300 ka pulis ang magaserbi bilang standby support force.
Magalab-ot naman sa 40 ka pulis ang magaserbi bilang drone operators nga i-deploy. Ang mga drone units makabulig sa mas komprehensibo nga pagbantay sa kabug-osan sang hublag.
Sa border control, masobra 530 ka personnel sang NCRPO ang i-deploy sa mga checkpoint area sa bug-os nga Metro Manila, samtang 436 ka pulis ang magasuporta sa traffic management.
Pahayag ni Aberin, tanan nga mga pulis ang gin-abisohan nga ipatuman kag i-obserba ang maximum tolerance.
