ROXAS CITY, CAPIZ- Ginapadayon sang Department of Health ang pagpalig-on sang Disaster Risk Reduction and Management in Health (DRRM-H) sa mga ospital kag healthcare facilities agud masiguro nga indi mag-untat ang serbisyo sa ikaayong-lawas apisar pa nga may kalamidad.
Sa interview sang Bombo Radyo kay Alvin Ian M. Blanco, Nurse III sang Bailan District Hospital sa Pontevedra, Capiz, iya ginpahayag nga ang Disaster Risk Reduction and Management in Health isa ka sistema nga naga-focus sa prevention, preparedness, response, recovery kag rehabilitation sang health sector.
Suno kay Blanco, nakasandig ini sa Republic Act No. 10121 ukon Philippine Disaster Risk Reduction and Management Act of 2010, nga nagahatag pwersa sa proactive nga risk reduction kag naga-empower sa mga Local Government Units kag sa National Disaster Risk Reduction and Management Council.
Para mahambal nga functional ang DRRM-H, ginlatag sang DOH ang apat ka criteria: may-ara DRRM-H Plan, trained nga Health Emergency Response Team, available nga health emergency commodities, kag operational nga operation center.
Pahayag niya, kabahin man sang preparasyon ang paghatag sang nagakaigo nga trainings sa Health Emergency Response Teams kag pagsigurado nga may yara sang mga bulong kag hygiene kits para sa mga apektado sang kalamidad.
Samtang, ginagamit man sang mga ospital ang Hospital Safety Index agud masiguro nga safe ang mga pasilidad, structural man ukon non-structural, kag mangin “last man standing” sa tion sang emerhensya.
Dugang pa sang natungdan, pamaagi sa DRRM-H institutionalization, ginapatun-an ang mas mangin handa, mas lig-on, kag mas responsive ang health system para sa mga pumuluyo sa tion sang kalamidad.
Interviewed by Bombo Jessa Mae Siman De Los Santos
