ROXAS CITY – Arestado ang isa ka drug surrenderee sa ginkasa nga drug buybust operation sang mga kapulisan sa Barangay Gabuan, Roxas City.
Ginkilala ang naaresto nga si Jeric Clarito, 37 anyos sang Barangay Dumulog, sining siyudad.
Sa interview sang Bombo Radyo kay Police Lieutenant Mark Anthony Garcia, team leader sang Provincial Drug Enforcement Unit (PDEU) sang Capiz Police Police Provincial Office (CPPO), ginpahayag sini nga narekober sa posesyon sang suspek ang 16 ka sachets sang shabu kag P1, 000 nga buybust money.
Hugot nga monitoring ang ginpatigayon sang mga otoridad sa suspek antes ginkasa ang nasambit nga operasyon.
Suno naman kay Punong Barangay Alfredo Villanueva, pangayaw lamang sa ila nga barangay ang nasambit nga suspek.
Suno diri nga gilayon sila nagapakig-angut sa mga otoridad pananglitan may mamonitor nga nagaduso sang ilegal nga droga sa ila barangay.
Gin-aku naman sang drug suspek nga iya ang nakuha nga mga shabu kag aminado man ini nga nagaduso siya kag nagagamit sang ilegal nga droga.
Gindugang pa sang suspek nga pinansiyal nga problema ang nagtulod sa iya nga magsulod sa ilegal nga aktibidad ilabi pa nga wala ini sang permanente nga trabaho kag separado pa sa iya nga asawa.
