Ginpamatukan sang mga biktima sang drug war ang hingyo sang defense team ni anay Presidente Rodrigo Duterte para sa impormasyon sa pila ka mga partisipante nga mahimo tawgon nga testigo sang piskalya sa kaso sang anay Presidente sa International Criminal Court (ICC) sa The Hague, Netherlands.
Ini ang ginpahayag sa isa ka walo ka panid nga public redacted document nga ginpaguwa sang ICC nga napetsahan Disyembre 19 kag ginpirmahan sang Office of Public Counsel for Victims principal counsel nga si Paolina Massidda, nga nagaserbe bilang legal representative sang mga gina-alegar nga mga biktima sa kaso batok sa anay Presidente.
Ginrason ni Massida nga ang pagpasugot sa hingyo sang kampo ni Duterte ang magakompromiso sa kaluwasan kag kaayuhan sang mga biktima, nga suno sa iya mangin paglapas sa mga probisyon sang Rome Statute.
Samtang, ang impormasyon nga ginapangayo sang depensa mahimo magresulta sa pagbuyagyag sang impormasyon nahanungod sa mga identidad sang mga biktima nga katapo sang Grupo A, nga isa sa tatlo ka grupo sang mga biktima nga nag-apply sa pag-intra sa kaso.
Madumduman nga sa request sang lead defense counsel ni Duterte nga si Nicholas Kaufman sang Setyembre 2, ginpangabay niya ang Pre-Trial Chamber I nga ipahibalo sa iya kon may mga aplikante nga biktima sang drug war sa Group 1 ang konektado sa mga ginsambit sa isa ka section sang Article 15 communication ni ICC Prosecutor Karim Khan, nga ginpahalin sa kaso sang mga anay Presidente.
Ginpahayag ni Kaufman nga ‘contaminated’ ang imbestigasyon nga ginpatigayon sa idalum ni Khan bangud sa kabaliskaran nga obligasyon ni Khan lakip na ang iya nagligad nga representasyon sa iya mga anay kliyente nga gin-alegar biktima sang drug war ni anay Presidente Duterte.
