ROXAS CITY – Magasugod na bwas nga adlaw ang dry-run sang mga mini-bus nga magabiyahe gikan sa Roxas City Integrated Transport Terminal.
Ini ang ginpahayag ni terminal administrator Victor Arcenas sang mainterview sang Bombo Radyo.
Suno kay Arcenas, lima ka mga mini-bus ang maga-biyahe kun sa diin tatlo ka mga units ang magabiyahe gikan sa terminal padulong sa Barangay Culasi vice-versa kag ang duha ka mga units naman ang maga-biyahe gikan sa terminal padulong sa Barangay Banica vice-versa.
Ang 22-seater nga mini-bus ang may yara pa sang wireless-fidelity ukon WiFI connection kag airconditioned.
Magasugod ang pag-biyahe sang nasambit nga mga mini-bus humalin alas siyete sa aga tubtob alas nueve sa gab-i.
Suno kay Arcenas, wala sang pagabaydan nga plete ang mga pasahero sa patigayunon nga dry-run sang mga mini-bus.
Sa adlaw sang Lunes sa masunod nga semana, magapatigayon sila sang caravan kag sa adlaw sang Martes opisyal na nga magasugod ang pag-biyahe sang amo nga mga bus.
(PHOTO FROM WEB)
