ROXAS CITY – Padayon ang pagpanagtag sang Social Welfare and Development (DSWD) 6 sang mga relief assistance sa lugar nga ginlaslas sang Bagyong Egay.
Sa interview sang Bombo Radyo kay Ms. Therese Fely Legaste tagpamaba sang Disaster Response sang Department of Social Welfare and Development (DSWD) 6, ginpahayag sini nga naglab-ot na sa 1.7-M nga mga relief assistance ang ila nga napanghatag sa nagkalain-lain nga probinsya sa bug-os nga Western Visayas.
Suno kay Legaste, pila sa may mga mataas nga apektado sang Bagyong Egay amu ang probinsya sang Negros Occidental, Iloilo, Aklan kag Antique.
Bangud sini, naglab-ot na sa 3,243 nga mga foodpacks ang natan-ay sang nasambit nga ahensya kung sa diin una sini nila nga ginpadulungan ang Negros Occidental nga may yara sang 12,809 nga apektado, Bacolod nga may 746.
Sa nasambit nga numero sang mga foodpacks, 2,643 diri ang napanagtag na sa Negros Occidental kag masobra 200 naman sa Bacolod City.
Ginpahayag man ni Legaste nga padayon ang ila pagpangdul-ong sang bulig sa nagkalain-lain nga probinsya ilabi na ang tuman nga naapektuhan sang nasambit nga bagyo.
Ba-se sa datos sang ahensya, may yara na sang kabug-usan nga 24, 153 ka mga pamilya ukon 105,017 ka mga indibidwal, ang apektado sang bagyo sa bug-os nga western Visayas.
Kung sa diin 2,151 ka mga pamilya ukon 9,651 ka mga indibidwal diri ang nagikan sa Aklan, Antique nga may 1,905 ka pamilya ukon 6,883 ka mga indibidwal, Guimaras 97 ka pamilya ukon 276 ka mga indibidwal kag Iloilo nga may 6,192 ka pamilya ukon 34, 118 ka mga indibidwal ang apektado.
Samtang, ginklaro man ni Legaste nga wala sang may nabalhag nga apektado ang probinsya sang Capiz.
Sa karun may yara pa nga 53, 437 tanan ka mga family foodpacks ang nakapreposisyon sa mga Local Government Unit (LGU) kag padayon pa ang ila nga pag-repack.
