ROXAS CITY – Ginkalipay sang Department of Social Welfare and Development (DSWD)- 6 Regional Director nga nakalab-ot na sa probinsiya sang Capiz ang Malasakit Center nga madamo na nga nabuligan.
Ginhimo ni Director Evelyn Macapobre ang pahayag kasunod sa pagtambong sa ginpatigayon nga blessing kag launching sang Malasakit Center sa Roxas Memorial Provincial Hospital.
Suno sa opisyal nga ikatatlo na ang probinsiya sang Capiz sa Rehiyon 6 nga ginpahamtangan sang Malasakit Center nga may katuyuan mabuligan ang pigado nga mga pumuluyo.
Ginkumpirma man ni Macapobre nga pagkatapos sa Capiz, pahamtangan man sang Malasakit Center ang probinsiya sang Aklan, agud madamo ang makabenepisyo sang bulig sang gobyerno.
Gintuad man sang opisyal nga ideya ni Senator Lawrence ‘’Bong’’ Go ang Malasakit Center nga una nagsugod sa Cebu kag gintingub sa isa ka talatapan sa ospital ang mga ahensiya sang gobyerno nga nagahatag assistance sa mga na-confine sa ospital, agud indi na mabudlayan ang nagafollow-up sang mga requirements para maka-avail sang bulig sang gobyerno.
Nahibaluan gikan kay Macapobre nga ginatinguhaan nga wala sang mabayaran ni singko sentimo ang mga pasyente nga yara sa pampubliko nga balay bululngan.
Samtang magabulig man ang DSWD sa iban nga galastusan sang mga pasyente kasubong sa pagkaon sang mga nagabantay ukon pamasahe.
