Gina-imbestigaran na subong sang Department of Social Welfare and Development (DSWD) ang mga reports nga may mga opisyal sang Barangay Quintin Salas, Jaro, Iloilo City ang nagkuha sang porsyento ukon nagbuhin sang cash assistance nga ginhatag sa mga residente sa idalom sang Assistance to Individuals in Crisis Situation (AICS) program.
Suno kay DSWD Spokesperson Assistant Secretary Irene Dumlao, ang ayuda nga para sa mga nagakinahanglan ang dapat nga kompleto ukon bilog nga makuha sang benepisyaryo kag indi pwede nga buhinan ukon bawion.
Pahayag niya, gilayon nga nagpatigayon sang imbestigasyon ang DSWD sa mga reports nga nabaton kag ginasiguro nga manabat ang mga responsable.
Pila ka mga benepisyaryo ang nagsiling nga ang barangay officials kag tanods sang Quintin Salas ang ginaalegar nagbuhin sang P8,000 sa P10,000 nga mabaton sa diin P2,000 lang ang nagkadto sa ila.
May mga residente man sang Barangay Lanit, Jaro ang nagpakigbahin sang kaangay nga reklamo sa diin may yara sang ginaalegar barangay personnel nga nagpadulong sa mga balay sang benepisyaryo agud magkolekta sang portion sang AICS financial aid.
Gina-remind sang DSWD Field Office 6 ang publiko nga magpabilin nga mag-aligmat batuk sa mga indibidwal ukon grupo nga nagabuhin sang AICS cash assistance.
Suno sa DSWD, lunsay mga kwalipikado lang nga indibidwal nga nagapangatubang sang krisis ang makabaton sang ayuda.
Gina-engganyo sang ahensya ang publiko nga gilayon i-report sa DSWD Office ang mga kaangay nga insidente ukon reklamo agud makapatigayon sang imbestigasyon.
