ROXAS CITY – Naubos na ang pondo sang Department of Social Welfare and Development (DSWD) para sa ila educational assistance in student in crisis nga programa sa idalom sang Aid to Individual in Crisis Situation (AICS).
Ini ang ginpahayag ni Atty. May Rago-Castillo, tagpamaba sang DSWD-Region VI sang mainterview sang Bombo Radyo.
Suno diri, luyag kuntani sang DSWD nga mabuligan pa ang madamo nga nagakinahanglan sang educational assistance, apang nagpahayag ang central office nga wala pa sila sa karon sang makuhaan nga pondo, kag may iban pa nga programa ang ahensya.
Samtang, sa ginpatigayon nga assessment kag payout sa katapusan nga Sabado, Setyembre 24, natigayon nga makabaton ang 778 ka mga benepisyaryo sang amu nga programa nga may kabaylo nga P2,431,000 nga nagamit nga pondo.
Ginpahayag nga naglapaw ang amu nga numero sa target sang ahensya bangud gin-akomodar ang mga nauna nga gin-text apang wala nagpadulong sa mismo adlaw sang ila schedule.
Sa pihak nga bahin, ginpahayag ni Castillo nga ang registration kag QR Code sang Region-VI ang exclusive lang sa Western Visayas, gani indi sini masabat kun ano ang natabo sa pag paregister sadtong estudyante nga taga President Roxas nga ginapakuha ang iya ayuda sa Samar bangud nagsala ini sa pagpa-register.
Ginklaro man sang tagpamaba sang DSWD-Region VI nga wala sila nagapabor sa ‘pakilala-pakilala’ kag kun may nahibaluan nga kaangay sini, nga reklamo ang ipalab-ot sa ila talatapan.
