ROXAS CITY – Nagpahamtang sang lugar ang katapo sang Department of Social Welfare and Development (DSWD)-Capiz para sa mga walk-ins nga luyag tsekyaron ang ila pangalan agud masiguro kun wala gid man bala sila nadala sa resipiyente sang educational assistance.
Ini ang nakumpirmar sang Bombo Radyo pinaagi sa pagpadulong sa SM-Roxas, nga amu ang payout venue sa katapusan nga schedule sang ahensya.
Ginabulubanta may 300 ka mga nagpasimpalad nga ginikanan kag estudyante ang nagpadulong sa nasambit nga mall.
Suno sa isa ka nagpasimpalad nga Iloy, kaaganhon pa ini nagpadulong sa venue kag indi magpauli tubtob makumpirmar nga wala gid man ini sa masterlist.
Nahibaluan nga sandig sa pahibalo sang DSWD-Western Visayas, 750 ang target sang ahensya nga mahatagan sang ayuda sa bug-os nga probinsya kun sa diin ang Roxas City ang may pinakadamo nga target beneficiaries.
