ROXAS CITY – Nagpaathag ang Department of Social Welfare and Development (DSWD) natuhoy sa ila pagsulundan sa deletion ukon pagdula sang pangalan sang pila ka mga senior citizen sa listahan sang makabaton sang social pension sang ahensiya.
Suno kay Marlon Malaga, Project Development Officer sang DSWD sa premier-distrito sang Capiz nga may mga ginasunod sila nga pagsulundan sa pagdula sang pangalan sang isa ka benepisyaryo ilabi na kun wala sini ma-comply ang pila ka mga rekisitos agud ma-qualify nga makabaton sang nasambit nga bulig-pinansiyal.
Ginpahayag sini nga ang nasambit nga pagsulundan ang sandig sa Republic Act 9994 nga ila ginapa-implementar sa tagsa ka mga DSWD municipal offices.
Kun wala nagatenir sa probinsiya sang Capiz ang isa ka benepisyaryo suno kay Malaga, posible man nga madula ang iya pangalan sa listahan sang mga beneficiaries.
Ginpanindugan man sini nga ila nga ginahatagan sang nagakaigo nga oras ang mga benepisyaryo agud ma-comply ang mga rekisitos nga ginapangayo sang talatapan.
May kapin duha ka semana tubtob isa ka bulan ang mga ini agud makumpleto ang mga requirements agud mangin kwalipikado nga makabaton sang social pension gikan sa ahensiya.
