ROXAS CITY – Nagpanugyan ang Department of Social Welfare and Development (DSWD) Regional Office 6 sa mga senior citizen nga maghulat lamang sang advisory gikan sa ila tagsa ka mga local government units (LGU’s) natuhoy sa schedule sang pag-release sang ila nga social pension.
Ini ang ginpahayag ni DSWD-6 Public Information Officer May Rago-Castillo sang mainterview sang Bombo Radyo.
Suno diri nga nagapadayon sa karon ang pag-release sang mga LGU’s sa Western Visayas apang indi pa sini mapat-od kun may nakasugod na nga LGU sa probinsiya sang Capiz.
Suno diri nga mas maayo kun hulat-hulaton lamang sang mga senior citizens ang mangin advisory sang ila tagsa ka mga MSWD-officers bangud nakamandu naman sila nga padasigon ang distribusyon sang amo nga ayuda.
Ginpahayag pa sini nga ila gina-rekomendar sa tagsa ka mga LGU’s ang ‘door-to-door’ nga pagpanghatag sang amo nga ayuda bangud ang mga katigulangan ang makabig nga ‘vulnerable’ nga makaangkon sang coronavirus disease (COVID-19).
Gindugang pa ni Castillo nga ang igahatag nga ayuda ang para sa una nga anom ka bulan sang tuig 2020 kag may pipila na lamang sila ka mga halatagan sang wala makabaton sang amo nga ayuda para sa tuig 2019.
