Naglab-ot sa P241.2 billion ang kabug-usan nga proposed budget sang Department of Social Welfare and Development ukon DSWD para sa tuig 2027, suno sa budget presentation sang ahensya sa House of Representatives Committee on Appropriations budget hearing subong nga adlaw, Setyembre 8.
Sa sini nga kantidad, P235.7 billion ang igahatag sa Office of the Secretary sang DSWD, samtang ang nabilin nga pondo amu ang para sa mga attached kag supervised agencies sini.
Mas manubo ang ginproposed nga pondo kumpara sa 2026 General Appropriations Act, luwas sa National Authority for Child Care ukon NACC kag National Commission for Senior Citizens ukon NCSC nga ginalauman nga magsaka ang ila pondo, lakip na bangud sa mga bag-o nga posisyon nga ginhimo ukon napun-an.
Sang Hulyo, ginpahayag ni DSWD Secretary Rex Gatchalian nga nagapangayo ang ahensya sang yara sa P270 billion nga budget para sa 2027, lakip na ang daku nga pondo para sa 4Ps kag Assistance to Individuals in Crisis Situations ukon AICS.
Ang P241.2-billion nga alokasyon kabahin pa lamang sang proposed budget kag mahimo pa ini magbag-o samtang nagapadayon ang deliberasyon sa Kongreso.
