Padayon nga ginatun-an kag ginaplastar sang Department of Social Welfare and Development (DSWD) ang iban pa nga mga programa kag bulig nga mahimo ihatag sa sektor sang transportasyon bangud sa nagapadayon nga krisis nga ginapangatubang sang pungsod.
Sa interview sang Bombo Radyo kay Ms. Katherine Joy M. Lamprea, Director III sang Office of the Assistant Regional Director for Operations, iya ginpahayag nga tuman gid ka apektado ang mga drivers kag operators sang amo nga sektor bangud sa padayon nga pagsaka sang presyo sang gatong tuga sang nagapadayon nga kinagamo sa Middle East.
Suno kay Lamprea, tanan kita apektado sang amo nga krisis apang sa subong, ang mga lehitimo anay nga mga drivers ang pagahatagan sang nasambit nga ayuda nagikan sa gobyerno pamaagi sa Cash Relief Assistance program sang DSWD.
Pahayag pa niya, wala man ginakalipatan ang mga colorum drivers kag ginatun-an pa sang mga natungdan kun ano nga bulig ang mahimo nga ihatag sa ila.
Nahibaluan nga subong nga adlaw Abril 8, nagpanagtag ang ila nga talatapan sang tag P5,000 nga ayuda kada isa sa kabug-usan nga numero nga 3, 867 nga mga lehitimo nga drivers sang Roxas City TODA.
