Ginatarget sang Department of Social Welfare and Development (DSWD) nga ipaagi sa e-wallets ang pagpanagtag sang cash aid kasunod sang pagkapatay sang isa ka motorcycle taxi rider samtang nagapila para sa payout sa Quezon City.
Suno kay DSWD Spokesperson Irene Dumlao, nagaubra na sila sang konsultasyon agud ma-adopt ang digital systems bangud daku ini nga bulig labi na gid sa mainit nga panahon.
Ginpahayag man niya, nga luyag sang ahensya nga malikawan ang kaangay nga insidente kag mapahagan-hagan ang operational kag administrative costs sa pagpanagtag sang ayuda.
Samtang sini, ginklaro naman ni Dumlao nga wala pa sang opisyal nga impormasyon nahanungod sa rason sang pagkapatay sang rider bangud ginahulat pa sang pamilya ang death certificate.
Dugang pa niya, wala ginapaabot sang DSWD ang kadamuon sang mga benepisyaryo nga nagtililipon sa payout site, gani ginpahayag nga dapat ginpatuman ang insakto nga crowd control measures.
Padayon naman sa gihapon ang DSWD sa paghatag sang bulig pinansyal kag ipa-gwa ang dugang nga schedule para sa mga wala pa nakabaton sang cash aid.
