Ginpasiguro sang Department of Social Welfare and Development Rehion 6 nga mahatagan sang relief assistance ang tanan nga tricycle driver sa Western Visayas.
Sa interview sang Bombo Radyo kay Therese Fely Legaste, public information officer sang Department of Social Welfare and Development Region 6 , iya ginpahayag nga base sa final consolidated report, may yara sang kabug-usan nga 3,628 ka benepisyaryo nga nagalab-ot sa P18,140,000 nga financial assistance.
Ini ang nagarepresent sang 88.92% accomplishment rate sang target nga benepisyaryo.
Pahayag pa niya, sa probinsya sang Capiz, ang banwa sang Panit-an ang nakabaton sang 459 ka mga benepisyaryo kag 130 ka mga benepisyaryo sa banwa sang Pilar ang nakabaton sang tig-P5,000 kada isa nga cash relief assistance.
Samtang, subong naman nga adlaw Abril 20, 2026, ang banwa sang Ivisan, Jamindan, Pontevedra, President Roxas, Sapian kag Sigma ang masunod nga pagapanagtagan sang cash relief assistance.
Ginapasiguro man sang natungdan nga magapadayon ang ila nga pagserbisyo agud nga matigayon nga mahatagan ang kutob sa apektado sang pagtaas nga presyo sang gatong.
